PARS

PARS

vox πολύσημος, inter alia, regionem notat, apud Sulp. Severum Histor. l. 1. et in Capitul. 3. ad L. Sal. quomodo Galli dicunt, Partie. Apud Patres passim Schismaticos, qui in Ecclesia schisma amplectuntur, seu qui Haereticis adhaerent, significat, sicque Ecclesiae opponitur. Unde Augustinus non uno in loco partis Donati meminit, ut et Optatus. In Aedibus sacris porro locus, ubi Viri stare consueverunt, Pars Virorum vocatur, in Ord. Roman. Diaconus stat versus ad Meridiem, ad quam Partem Viri solent confluere. Stabant autem ii in navi, ad Meridiem, ut hic dicitur, et ad dextram, mulieribus ad Septentrionem et sinistram stationem suam habentibus. Ita enim et Amalarius de Eccles. l. 3. c. 2. 32. Masculi stant in Australi parte, et feminae, in Boreali. Dexcripsit quidem Baronius A. C. 57. n. 125. hanc Inscr. Christianam Vatican. AD SANCTUM PETRUM APOSTOLUM, ANTE REGIA, IN PORTICU COLUMNA SECUNDA, QUANDO INTRAMUS SINISTRA PARTE VIRORUM LUCILIUS ET IANUARIA HONESTA FEMINA, Ex qua is colligit, Viros sinistram templi partem, ut tum digniorem habitam, mulieres vero dextram occupâsse, quod quidem sibi vix constat. Nam cum vetera Christianorum Templa ad Orientem exstructa fuisse certum sit, virosque in iis ad Meridiem, mulieres ad Septentrionem, locum habuisse, constet, necesse est, ut introeuntibus Pars Virorum dextra fuerit, quod Inscriptioni adversari videtur: nisi, quod retur du Fresne, sinistra pars Virorum hôc locô sit, pars sinistra respectu Partis virorum. Nam constat, partem Altaris, in quo legitur Euangelium, sinistrum cornu appellari. Vide praefatum Car. du Fresne Glossar.